1. Ábyrgðaraðili

Klúbba er í eigu og rekstri Revolv ehf.

Revolv ehf. Kennitala: 650326-2610 Þjóttusel 3, 109 Reykjavík Netfang: revolv@revolv.is Vefsíða: https://www.klubba.is

Hver ber ábyrgð á vinnslunni fer eftir tilgangi hennar.

Revolv ehf. er ábyrgðaraðili þeirrar vinnslu sem félagið ákveður sjálft tilgang og nauðsynlegar aðferðir við. Það á við um stofnun og umsjón aðganga, innskráningu og öryggi þjónustunnar, varnir gegn misnotkun, yfirferð tilkynninga um óviðeigandi samskipti, aðstoð við notendur, aðgerðaskrár, tengingu við Konto sem notandi velur sjálfur og lagaskyldur Revolv.

Íþróttafélag ákveður hvaða dómara það hefur í dómarahópi sínum, hvaða verkefnum það úthlutar, hvaða boð það sendir og hvaða þóknanir það samþykkir. Vegna þeirrar umsýslu er félagið ábyrgðaraðili og Revolv vinnsluaðili sem vinnur upplýsingarnar fyrir hönd félagsins og samkvæmt fyrirmælum þess.

Revolv og félög eru ekki sameiginlegir ábyrgðaraðilar nema þau ákveði í sameiningu tilgang og nauðsynlegar aðferðir tiltekinnar vinnslu.

2. Hvaða persónuupplýsingar vinnum við?

Við vinnum upplýsingar sem tengjast notkun og rekstri Klúbba.

Þær geta meðal annars verið:

• Aðgangs- og prófílupplýsingar: nafn, netfang, símanúmer, prófílmynd, sveitarfélag, póstnúmer, aðgangshlutverk og upplýsingar sem tengjast auðkenningu og innskráningu.
• Félagsupplýsingar: tengsl við íþróttafélög, aðild að dómarahópum, boð, aðildarbeiðnir, stjórnunarheimildir og breytingar á aðild.
• Leikja- og verkefnaupplýsingar: leikir, dómarasæti, umsóknir, úthlutanir, svör við boðum, staðfestingar, verkefnasaga og þóknanir.
• Skilaboð og samskipti: innihald skilaboða, sendandi, viðtakandi, tímasetningar, lesstaða og upplýsingar um viðkomandi samtal.
• Tilkynningar um óviðeigandi samskipti: ástæða tilkynningar, lýsing, viðkomandi samtal, nauðsynleg skilaboðagögn og upplýsingar um yfirferð eða aðgerðir vegna tilkynningar.
• Reiknings- og fjárhagsupplýsingar: lögformlegt nafn, kennitala, skattalegar upplýsingar, VSK-staða, reikningsaðilar, þóknanir, fjárhæðir, númer útgefinna reikninga og staða reikninga.
• Upplýsingar um Konto-tengingu: aðgangslyklar og heimildir sem Konto veitir, kennitala tengds Konto-aðgangs, tilvísanir í viðskiptavini og reikninga hjá Konto, staða reikninga og svör Konto.
• Tilkynninga- og tækjaupplýsingar: upplýsingar um tilkynningaheimildir, auðkenni uppsetningar appsins, push-token og tæknilegar upplýsingar sem nauðsynlegar eru til að skrá tæki fyrir tilkynningar.
• Rekstrar- og öryggisupplýsingar: tæknileg beiðnigögn, IP-tölur þar sem þær falla til, villugögn, aðgerðaskrár, upplýsingar um öryggisatvik og beiðnir um aðstoð eða eyðingu aðgangs.

Ekki eru allar þessar upplýsingar nauðsynlegar fyrir alla notendur. Umfang vinnslu fer meðal annars eftir hlutverki, aðgerðum og þeim eiginleikum þjónustunnar sem eru í notkun.

Nafn og netfang eru nauðsynleg til að stofna og nota aðgang. Kennitala og skattupplýsingar eru aðeins nauðsynlegar ef reikningsvirkni er notuð. Ef slíkar upplýsingar eru ekki veittar er ekki hægt að nota viðkomandi virkni.

3. Hvaðan koma upplýsingarnar?

Persónuupplýsingar geta komið:

• Beint frá þér þegar þú stofnar aðgang eða notar þjónustuna.
• Frá íþróttafélagi sem býður þér aðgang, samþykkir aðild eða úthlutar þér verkefni.
• Frá leikjadagskrám og ytri íþróttakerfum sem félög nota til að flytja inn leikjaupplýsingar.
• Frá þjónustum sem þú velur sjálfur að tengja við Klúbba.
• Frá tæknilegum kerfum sem nauðsynleg eru fyrir öruggan rekstur þjónustunnar.

4. Tilgangur og lagagrundvöllur vinnslu

Við vinnum persónuupplýsingar til að veita og reka Klúbba. Lagagrundvöllurinn fer eftir tilgangi vinnslunnar:

• Aðgangur, innskráning, verkefni, boð, samskipti, tilkynningar og reikningsupplýsingar sem þú skráir: nauðsyn vegna samnings um notkun þjónustunnar. Hjá notendum yngri en 18 ára byggist sama vinnsla á lögmætum hagsmunum, eins og lýst er í 16. kafla.
• Umsýsla félags með dómarahóp, úthlutanir, boð og þóknanir: félagið ákveður lagagrundvöllinn, sem er að jafnaði samningur félagsins við dómarann eða lögmætir hagsmunir félagsins af því að skipuleggja dómgæslu. Revolv vinnur upplýsingarnar fyrir hönd félagsins.
• Öryggi, varnir gegn misnotkun, yfirferð tilkynninga, aðgerðaskrár, villugreining og aðstoð: lögmætir hagsmunir Revolv og notenda af öruggri og áreiðanlegri þjónustu.
• Varðveisla reikningsgagna: bókhaldsskylda dómara og félaga, sem Revolv styður fyrir þeirra hönd, og lögmætir hagsmunir af því að geta staðreynt, sett fram eða varið réttarkröfur.
• Tilkynningar til barnaverndar eða annarra yfirvalda: lagaskylda, svo sem tilkynningarskylda samkvæmt barnaverndarlögum, og eftir atvikum brýnir hagsmunir einstaklings.
• Valfrjálsar notkunarmælingar: samþykki. Þær eru ekki virkjaðar í Klúbba.

Lögmætir hagsmunir geta meðal annars falist í því að verja aðganga, koma í veg fyrir misnotkun, tryggja rétta verkefnaskráningu og varðveita nauðsynleg gögn vegna ágreinings.

Við vinnslu sem byggist á lögmætum hagsmunum þarf að taka tillit til réttinda og hagsmuna einstaklinga, sérstaklega barna.

Kennitala er aðeins notuð þegar reikningsvirkni er notuð, til að auðkenna aðila reiknings með öruggum hætti og til að framfylgja tímabundinni stöðvun reikningsútgáfu fyrir notendur undir 18 ára meðan fyrirframgreiddur Konto-kostnaður er óstaðfestur.

Samþykki notkunarskilmála felur ekki sjálfkrafa í sér samþykki fyrir allri vinnslu persónuupplýsinga. Nauðsynleg vinnsla byggist ekki á samþykki.

Klúbba tekur ekki ákvarðanir sem byggjast eingöngu á sjálfvirkri vinnslu og hafa réttaráhrif á notendur eða snerta þá með sambærilegum hætti að verulegu leyti.

Sjálfvirkar athuganir stöðva reikningsútgáfu þegar kennitölur stemma ekki og fyrir notendur undir 18 ára meðan kostnaðarfyrirkomulagið er óstaðfest. Hægt er að hafa samband við Revolv vegna þeirra.

5. Hverjir geta fengið aðgang að upplýsingum?

Aðgangur innan Klúbba fer eftir hlutverki notanda og tengslum við viðkomandi félag.

Dómari getur skoðað eigin prófíl, verkefni, greiðsluupplýsingar og þau samskipti sem hann hefur heimild til að nálgast.

Heimilaðir stjórnendur íþróttafélags geta skoðað upplýsingar sem nauðsynlegar eru til að halda utan um dómarahóp, leiki, verkefni, samskipti og reikninga félagsins.

Leit að dómurum sýnir ekki fullt netfang eða símanúmer. Stjórnendur félags sjá samskiptaupplýsingar dómara þegar dómarinn er virkur í dómarahópi félagsins eða hefur samþykkt verkefni á yfirstandandi eða komandi leik þess.

Fleiri en einn stjórnandi getur haft aðgang að samtali sem fer fram fyrir hönd félags. Skilaboð við félag eru því ekki einkasamskipti við einn tiltekinn stjórnanda.

Sérstaklega heimilaðir kerfisstjórnendur Revolv hafa aðgang að upplýsingum sem þörf er á vegna rekstrar, öryggis, aðstoðar og yfirferðar tilkynninga, svo sem nöfnum, netföngum, aðild að félögum, leikjum, verkefnum og þóknunum.

Til að aðstoða félög og greina villur geta kerfisstjórnendur opnað lesaðgang að viðmóti félags. Þar sjá þeir leiki, dómarahóp, þóknanir og stillingar félagsins en geta engu breytt, og samtöl félagsins við dómara eru ekki sýnd. Skráð er hver opnar og lokar slíkri skoðun og hvenær.

Í stjórnborði Klúbba takmarkast aðgangur kerfisstjórnenda að efni skilaboða við skilaboð sem fylgja tilkynningu.

Aðild að einu félagi veitir ekki sjálfkrafa aðgang að upplýsingum annars félags.

Prófílmyndir og félagamerki geta verið birt í gegnum myndaslóðir sem eru aðgengilegar utan innskráðs svæðis. Því ætti ekki að nota slíkar myndir til að miðla trúnaðarupplýsingum.

6. Skilaboð og samskipti

Skilaboðakerfi Klúbba er ætlað samskiptum milli félaga og dómara. Samtöl eru alltaf milli dómara og félags, ekki milli einstakra notenda.

Við vinnum innihald skilaboða, sendanda, tímasetningar, lesstöðu og aðrar upplýsingar sem nauðsynlegar eru til að veita þjónustuna.

Skilaboðasaga getur varðveist þótt aðild að félagi breytist eða möguleikar til að senda ný skilaboð verði takmarkaðir.

Þegar notandi fjarlægir eigin skilaboð eru þau falin í samtalinu, en innihald þeirra getur varðveist í kerfinu.

Söguleg skilaboð eru ekki endilega fjarlægð þegar notandi eyðir aðgangi sínum. Þau geta varðveist vegna samskiptasögu, verkefna, réttinda annarra eða úrlausnar ágreinings.

Aðgangur að slíkum upplýsingum er áfram háður viðeigandi heimildum.

7. Tilkynningar um óviðeigandi samskipti

Notendur geta tilkynnt óviðeigandi samtöl eða samskipti innan Klúbba.

Þegar tilkynning er send geta eftirfarandi upplýsingar verið vistaðar:

• Auðkenni tilkynnanda og viðkomandi samtals.
• Ástæða tilkynningar og lýsing tilkynnanda.
• Afrit af allt að 20 nýjustu skilaboðum samtalsins þegar tilkynningin er stofnuð, eða fram að tilkynntum skilaboðum, þar á meðal skilaboðum sem hafa verið fjarlægð úr samtalinu.
• Upplýsingar um yfirferð, niðurstöðu og aðgerðir vegna málsins.
• Nauðsynlegar aðgerðaskrár um aðgang að tilkynningunni og meðferð hennar.

Aðgangur að slíkum tilkynningum er takmarkaður við sérstaklega heimilaða aðila sem sinna öryggis- og stjórnunarverkefnum fyrir Revolv.

Hinn aðili samtalsins fær ekki sjálfkrafa upplýsingar um hver lagði fram tilkynninguna.

Við yfirferð getur verið gripið til viðeigandi aðgerða, svo sem að fela skilaboð, loka samtali eða takmarka sendingarheimildir.

Tilkynningar eru ekki vaktaðar allan sólarhringinn. Ef einhver er í bráðri hættu skal hringja í 112.

Ef upplýsingar varða mögulegt alvarlegt brot eða hættu fyrir einstakling geta þær verið varðveittar eða afhentar lögbærum yfirvöldum þegar lög heimila eða krefjast þess. Ef ástæða er til að ætla að barn búi við hættu tilkynnum við það barnavernd, eins og öllum ber að gera samkvæmt barnaverndarlögum.

8. Leikir, verkefni og úthlutanir

Klúbba vinnur upplýsingar um leiki, dómarasæti, umsóknir, úthlutanir og staðfestingar á verkefnum.

Upplýsingarnar geta verið skráðar af félögum eða fluttar inn úr öðrum leikjakerfum.

Þegar leikjadagskrá breytist geta viðeigandi upplýsingar verið uppfærðar innan þjónustunnar.

Sögulegar upplýsingar um verkefni, úthlutanir og staðfestingar geta varðveist vegna rekstrarsögu, reikningsumsýslu eða úrlausnar ágreinings.

9. Reikningsupplýsingar og Konto

Klúbba getur boðið eiginleika sem tengjast þóknunum, reikningsupplýsingum og reikningsumsýslu.

Þegar þessir eiginleikar eru notaðir getum við unnið upplýsingar eins og lögformlegt nafn, kennitölu, skatta- og VSK-upplýsingar, reikningsaðila, fjárhæðir og reikningsstöðu.

Reikningssaga getur tengst einstökum verkefnum eða uppgjörstímabilum.

Notendum getur staðið til boða að tengja Konto við Klúbba. Slík tenging er valfrjáls og getur verið háð samþykki notanda og skilmálum viðkomandi þjónustu.

Konto er sjálfstæð reikningaþjónusta sem annar aðili rekur og ber ábyrgð á eigin vinnslu. Konto sér sjálft um innskráningu og auðkenningu notenda sinna og um bankatengda þjónustu. Klúbba tekur ekki við rafrænum skilríkjum, lykilorðum eða innskráningarupplýsingum í banka.

Við tengingu fær Klúbba aðgangslykil frá Konto. Klúbba vinnur kennitölu tengds aðgangs, upplýsingar sem þarf til að stofna reikning, tilvísanir í reikninga, stöðu þeirra og svör Konto.

Klúbba tekur ekki við, varðveitir eða skiptir fjármunum sem íþróttafélög greiða dómurum fyrir dómgæslu.

Bankareikningsupplýsingar sem Konto annast eru ekki vistaðar hjá Klúbba.

Reikningar eru gefnir út úr Konto-aðganginum sem notandinn tengir. Konto sér um auðkenningu reikningsútgefanda. Klúbba krefst ekki sérstaks samanburðar á kennitölum til að tengja aðgang. Notendur undir 18 ára geta lokið uppsetningu, en reikningsútgáfa bíður þess að fyrirframgreiddur Konto-kostnaður sé tryggður.

Reikningsupplýsingar og sögulegar staðfestingar geta varðveist eftir að aðgangi er eytt, meðal annars vegna bókhaldsskyldu dómara og félaga, annarra lagaskyldna, réttarkrafna eða annarra lögmætra ástæðna.

10. Tilkynningar og upplýsingar um tæki

Klúbba birtir tilkynningar innan þjónustunnar og getur boðið push-tilkynningar í farsíma þegar sú virkni er tiltæk.

Þegar notandi veitir tilkynningaheimild eða skráir tæki fyrir push-tilkynningar geta verið unnar upplýsingar um tækið, auðkenni uppsetningar og push-token.

Tæknileg þjónusta sem sér um afhendingu tilkynninga getur einnig unnið nauðsynleg auðkenni og afhendingarupplýsingar.

Við takmörkum innihald push-tilkynninga eftir því sem kostur er og forðumst að senda óþarfa viðkvæmar upplýsingar í þeim.

Push-sendingar geta verið óvirkar á tilteknum stigum þjónustunnar.

Notendur geta stjórnað tilkynningaheimildum í stillingum tækisins og notað meginvirkni Klúbba án þess að samþykkja push-tilkynningar.

11. Tæknilegar upplýsingar og villugreining

Við vinnum nauðsynlegar tæknilegar upplýsingar til að tryggja öryggi, rekstur og áreiðanleika Klúbba.

Slíkar upplýsingar geta meðal annars tengst villum, útgáfum hugbúnaðar, tæknilegum beiðnum, afköstum og öryggisatvikum.

Þar sem villugreining er virkjuð eru unnar upplýsingar um tæknilegar bilanir, svo sem tegund villu, útgáfu hugbúnaðar og staðsetningu í kóða.

Áður en villuskýrsla er send fjarlægjum við innihald beiðna, notendaauðkenni og texta villuboða. Þjónustuaðilinn sem tekur við villuskýrslum getur þó séð IP-tölu sendanda.

Í stillingum dómara á vefnum og í appinu er hægt að slökkva á sjálfvirkum villuskýrslum frá viðkomandi vafra eða tæki. Villur sem verða á netþjónum Klúbba eru áfram skráðar.

Valfrjálsar notkunarmælingar eru ekki virkjaðar. Ef þær verða teknar í notkun verður það aðeins með samþykki sem hægt er að afturkalla.

Við notum ekki valfrjálsar notkunarmælingar til að skrá innihald skilaboða, kennitölur eða fjárhagsupplýsingar.

12. Vistun upplýsinga á tæki notanda

Vefurinn og farsímaforritið geta vistað nauðsynlegar upplýsingar á tæki notanda til að halda utan um innskráningu, stillingar og virkni þjónustunnar.

Farsímaforritið getur jafnframt geymt afmarkaðar verkefna- og leikjaupplýsingar á tækinu svo hægt sé að skoða þær þegar nettenging er takmörkuð.

Slík vistun getur meðal annars nýtt örugga geymslu fyrir aðgangsupplýsingar og staðbundna gagnageymslu fyrir afmörkuð notandagögn.

Við útskráningu, breytingu á aðgangi eða eyðingu reiknings geta viðeigandi staðbundin gögn verið hreinsuð samkvæmt virkni þjónustunnar.

13. Þjónustuaðilar og miðlun upplýsinga

Við notum utanaðkomandi þjónustuaðila til að styðja við rekstur Klúbba.

Þeir geta meðal annars séð um hýsingu, gagnageymslu, auðkenningu, tölvupóstsendingar, tilkynningar, reikningsumsýslu og tæknilega bilanagreiningu.

Þjónustuaðilar fá aðeins aðgang að þeim upplýsingum sem nauðsynlegar eru vegna viðkomandi þjónustu og vinnsla þeirra skal vera í samræmi við gildandi lög og viðeigandi samninga.

Gagnagrunnur, auðkenning og skráageymsla Klúbba eru hýst á Írlandi og netþjónar vefsins keyra í Dublin.

Tölvupóstþjónusta okkar geymir sendingarskrár í Bandaríkjunum. Push-tilkynningar fara um þjónustu farsímaframleiðenda og þjónustuaðila sem vinna gögn meðal annars í Bandaríkjunum. Villugreiningarþjónusta getur einnig unnið gögn utan Evrópska efnahagssvæðisins.

Þegar notandi velur sjálfur að tengja utanaðkomandi þjónustu geta upplýsingar einnig verið afhentar henni vegna þeirrar tengingar.

Hluti vinnslunnar fer fram utan Evrópska efnahagssvæðisins, meðal annars í Bandaríkjunum, eða getur falið í sér aðgang að upplýsingum þaðan. Slík miðlun þarf að byggjast á viðeigandi heimildum og verndarráðstöfunum samkvæmt persónuverndarlögum, svo sem ákvörðun um fullnægjandi vernd eða stöðluðum samningsákvæðum.

Hægt er að óska eftir frekari upplýsingum um viðtakendur, vinnslustaði og viðeigandi verndarráðstafanir á revolv@revolv.is.

14. Varðveisla persónuupplýsinga

Við varðveitum persónuupplýsingar eins lengi og nauðsynlegt er vegna þess tilgangs sem þeim var safnað fyrir, gildandi lagaskyldna, öryggis eða réttarkrafna.

Ekki gildir einn varðveislutími um allar upplýsingar.

• Aðgangs- og prófílupplýsingar eru varðveittar meðan aðgangur er virkur og hreinsaðar eða fjarlægðar við eyðingu aðgangs.
• Reikningsupplýsingar í prófíl, svo sem lögformlegt nafn og kennitala, eru fjarlægðar við eyðingu aðgangs.
• Útgefnir reikningar og tengd fjárhagsgögn geta innihaldið nafn og kennitölu og eru varðveitt eftir eyðingu aðgangs. Dómarar og félög bera sjálf bókhaldsskyldu og eiga að varðveita bókhaldsgögn í sjö ár frá lokum reikningsárs. Við miðum við að varðveita reikningsgögn í Klúbba jafn lengi svo þau nýtist þeim og vegna réttarkrafna, og eyða þeim að því loknu.
• Verkefnasaga og úthlutanir geta varðveist eftir lok aðildar eða eyðingu aðgangs vegna sögulegrar skráningar, reikningsumsýslu og úrlausnar ágreinings.
• Skilaboð geta varðveist eftir eyðingu aðgangs þegar þess er þörf vegna samskiptasögu, hagsmuna annarra eða réttarkrafna.
• Tilkynningar um óviðeigandi samskipti: við miðum við að eyða tilkynningum sem vísað er frá einu ári eftir að máli lýkur og tilkynningum sem leiða til aðgerða fjórum árum eftir að máli lýkur. Gögn sem varða mál hjá barnavernd eða öðrum yfirvöldum eru varðveitt meðan málið er opið og síðan yfirfarin og takmörkuð við það sem enn er nauðsynlegt.
• Innskráningarkóðar og tímabundin öryggisgögn eru eydd sjálfkrafa innan sólarhrings og loknar tilkynningasendingar innan 90 daga.
• Öryggisskrár, villugögn og eyðingarbeiðnir eru varðveitt eftir eðli þeirra og tilgangi.
• Afrit gagnagrunns eru tekin handvirkt fyrir stærri kerfisbreytingar og geymd með takmörkuðum aðgangi. Gögn sem hefur verið eytt geta verið í slíkum afritum þar til afritunum er eytt.

Sjálfvirk eyðing að liðnum þessum tímum er ekki enn innleidd fyrir reikningsgögn, skilaboð, verkefnasögu eða tilkynningar. Þar til hún er innleidd eru gögnin varðveitt áfram með takmörkuðum aðgangi. Beiðnir um eyðingu eða takmörkun vinnslu eru metnar með tilliti til gildandi laga og þeirra réttinda sem eiga við.

Hægt er að óska eftir nánari upplýsingum um varðveislu tiltekinna gagna á revolv@revolv.is.

15. Eyðing aðgangs

Notendur geta óskað eftir eyðingu Klúbba-aðgangs í aðgangsstillingum eða á:

https://www.klubba.is/delete-account

Staðfesta getur þurft auðkenni notanda áður en beiðni er framkvæmd.

Í ákveðnum tilvikum getur þurft að leysa úr atriðum áður en eyðingu lýkur, svo sem eignarhaldi á félagi, samþykktum en óloknum verkefnum eða óuppgerðum reikningum.

Beiðnin er afgreidd þegar engin slík atriði standa í vegi og hægt er að fylgjast með stöðu hennar með staðfestingarnúmeri.

Við framkvæmd eyðingar eru innskráningaraðgangur og almennar prófílupplýsingar fjarlægð eða hreinsuð samkvæmt viðeigandi ferli. Þetta getur meðal annars náð til aðgangsauðkenna, prófílmynda og skráðra tækja. Í skilaboðasögu birtist nafn þitt eftir það sem „Eyddur aðgangur“.

Eyðing aðgangs þýðir ekki að öllum sögulegum gögnum sé sjálfkrafa eytt. Tilteknar verkefnaskrár, reikningsupplýsingar, skilaboð og öryggisgögn geta varðveist þegar lögmætur grundvöllur er fyrir því.

Ef þú getur ekki notað sjálfsafgreiðslu eða þarft aðstoð vegna eyðingar getur þú haft samband á revolv@revolv.is.

Eyðing Klúbba-aðgangs eyðir ekki sjálfkrafa sjálfstæðum aðgangi þínum hjá öðrum þjónustum sem þú hefur tengt við Klúbba. Klúbba eyðir eigin tengingu við Konto, en afturkalla þarf samþykki hjá Konto sérstaklega ef það á við.

16. Persónuvernd ungra dómara

Klúbba er ætlað notendum 13 ára og eldri og er meðal annars notað í tengslum við dómgæslu ungmenna. Við stofnun aðgangs staðfestir notandi að hann hafi náð þeim aldri.

Notendur undir 18 ára aldri geta notað leiki, verkefni, boð, samskipti og yfirlit yfir þóknanir. Dómarar undir 18 ára geta skráð reikningsupplýsingar og tengt Konto. Klúbba greiðir Konto-kostnað þeirra með fyrirframgreiðslu áður en reikningsútgáfa hefst.

Við byggjum ekki nauðsynlega vinnslu á samþykki barns. Þar sem óvíst er að notandi yngri en 18 ára geti einn gert samning um þjónustuna byggist vinnslan á lögmætum hagsmunum hans af því að taka þátt í dómgæslu og hagsmunum félaga af því að skipuleggja hana.

Við höfum metið þá hagsmuni með tilliti til barna og takmarkað vinnsluna í samræmi við það:

• Við söfnum ekki fæðingardegi eða upplýsingum um forráðamenn.
• Samtöl eru aðeins milli dómara og félags og fleiri en einn stjórnandi félags getur séð þau.
• Hægt er að tilkynna óviðeigandi samskipti og tilkynningar um hættu fyrir barn eru teknar fyrir á undan öðrum.
• Notkunarmælingar eru ekki virkjaðar og upplýsingar ungra notenda eru ekki notaðar til markaðssetningar.
• Reikningsútgáfa í Klúbba fyrir notendur undir 18 ára er lokuð meðan fyrirframgreiddur Konto-kostnaður er óstaðfestur.

Þegar vinnsla persónuupplýsinga byggist á samþykki barns gilda sérstakar reglur samkvæmt persónuverndarlögum.

Klúbba safnar ekki fæðingardegi. Aldur er reiknaður út frá kennitölu í reikningsupplýsingum til að framfylgja tímabundinni stöðvun reikningsútgáfu fyrir notendur undir 18 ára.

Notendur og forráðamenn geta haft samband við Revolv vegna spurninga um vinnslu persónuupplýsinga ungra dómara. Forráðamaður getur nýtt réttindi barns fyrir þess hönd að því marki sem lög heimila.

17. Öryggi persónuupplýsinga

Við beitum tæknilegum og skipulagslegum ráðstöfunum til að vernda persónuupplýsingar gegn óheimilum aðgangi, breytingum, tapi og misnotkun.

Þær geta meðal annars falið í sér aðgangsstýringar, auðkenningu, dulkóðun í flutningi upplýsinga, takmörkun heimilda, rekstrarvöktun og viðeigandi öryggisprófanir.

Engin tæknileg lausn getur tryggt algert öryggi við allar aðstæður.

Ef öryggisbrestur verður förum við með hann samkvæmt lögum. Við tilkynnum Persónuvernd um brest sem líklegt er að leiði til áhættu innan 72 klukkustunda og látum þá sem í hlut eiga vita ef áhættan er mikil. Varði bresturinn upplýsingar sem við vinnum fyrir félag látum við félagið vita án tafar.

18. Réttindi þín

Þú getur, eftir því sem gildandi lög heimila, óskað eftir:

• Aðgangi að persónuupplýsingum um þig.
• Leiðréttingu rangra eða ófullnægjandi upplýsinga.
• Eyðingu persónuupplýsinga.
• Takmörkun vinnslu.
• Að andmæla vinnslu sem byggist á lögmætum hagsmunum.
• Afhendingu eða flutningi gagna þegar réttur til þess á við.
• Afturköllun samþykkis þegar vinnsla byggist á samþykki.

Afturköllun samþykkis hefur ekki áhrif á lögmæti vinnslu sem fór fram áður en samþykkið var afturkallað.

Réttindi geta verið háð takmörkunum samkvæmt lögum, meðal annars vegna réttinda annarra einstaklinga, lagaskyldna eða varðveislu fjárhagsgagna.

Til að nýta réttindi þín getur þú haft samband á revolv@revolv.is. Við svörum að jafnaði innan mánaðar.

Varði beiðnin upplýsingar sem félag ber ábyrgð á komum við henni til félagsins og aðstoðum það við að svara. Þú getur einnig snúið þér beint til félagsins.

Þú getur einnig lagt fram kvörtun hjá Persónuvernd.

19. Breytingar á stefnunni

Við uppfærum þessa stefnu eftir því sem þjónustan, gagnavinnsla eða gildandi lög breytast.

Gildandi útgáfa er birt á https://www.klubba.is/privacy ásamt dagsetningu síðustu uppfærslu.

Verulegar breytingar verða kynntar með viðeigandi hætti þegar þess er þörf.

Stefnan er samin á íslensku. Ef misræmi er á milli íslensku og ensku útgáfunnar gildir sú íslenska, nema lög mæli fyrir um annað.

Revolv ehf. Kt. 650326-2610 Þjóttusel 3, 109 Reykjavík revolv@revolv.is